Azərbaycan Prezidenti yanında Bilik Fondunun və Quba Rayon İcra Hakimiyyətinin dəstəyi ilə, Nitq İnkişaf Mərkəzinin rəhbəri Esmira Kazımova, PNİM İnkişaf Mərkəzinin rəhbəri Esmira Qafarova və Viqas Med Quba Nitq İnkişaf Mərkəzinin rəhbəri Fidan Bağırovanın iştirakı ilə “Xüsusi qayğıya ehtiyacı olan uşaqlar üçün ödənişsiz seminar və dəyərləndirmə” keçirilib. Newscenter.az-ın xəbərinə görə, ümummilli lider Heydər Əliyevin “Fəxr edirəm ki, bizim Azərbaycanın gözəl, göyçək, istedadlı balaları, övladları var. Fəxr edirəm ki, Azərbaycanın gələcəyi bu qədər gözəl təməl əsasında qurulur. Siz bugünkü həyatınızla, təhsilinizlə, öz istedadınızı inkişaf etdirməklə Azərbaycanın gələcəyinin binasını qurursunuz, böyük binanı qurursunuz. Müstəqil Azərbaycanın, daim müstəqillik içində yaşayan Azərbaycanın böyük binasını qurursunuz” sözləri ilə başlanan tədbirdə əvvəlcə xüsusi qayğıya ehtiyacı olan uşaqlar yoxlanılıb. İştirakçı mütəxəssislər tərəfindən uşaqlar müayinə edilib. Quba Rayon İcra Hakimiyyətin başçısı aparatının məsul əməkdaşı Könül Məmmədova çıxışında Qubada bu cür seminarın ilk dəfə təşkil olunmasının əhəmiyyətindən danışıb. O, bu kimi seminarların keçirilməsinin müsbət cəhətlərini xüsusi olaraq qeyd edib.
Viqas Med Quba psixioloji və nitq inkaşı mərkəzinin rəhbəri Fidan Bağırova Quba şəhərində 1 il ərzində qazanılmış nailiyyətlər haqqında tədbir iştirakçılarına məlumat verib. O, autizm sindromu haqqında iştirakçıları məlumatlandıraraq, həmin problemin fəsadları və aradan qaldırılması, autizmli xəstələrə diqqət və qayğı, onlar üçün profilaktiki tədbirlərdən danışıb. Sonda tədbir iştirakçılarına Sertifikat və Təşəkkürnamə təqdim olunub. Tədbirdə iştirakına və ona informasiya dəstəyinə görə, kanal15.tv portalı da “Təşəkkürnamə” ilə təltif olunub.